Həmin teleqramlardan birində qeyd edilir ki, iyunun 26-ı və 27-də ABŞ-ın İqtisadi və Biznes məsələləri üzrə Xüsusi Nümayəndəsi Frank Mermoudun Bakıya səfəri zamanı bir neçə biznes sahibi, beynəlxalq maliyyə qurumunun nümayəndəsi və o cümlədən də Coca-Cola şirkətinin təmsilçiləri ilə görüşüb.
Onların çoxu Azərbaycanda biznes mühitindəki problemlərə diqqət çəkib, onların mümkün həlli yollarını söyləyiblər.
Teleqramda yazilir:
100 000 dollar rüşvət tələbi və Mehdiyevə şikayətin aqibəti
Coca-Colanın Maliyyə direktoru Okan Gursan və Təchizat Şəbəkəsi meneceri Rəna Məmmədova Azərbaycanda biznes mühitinin daha ciddi problemlərindən bəhs etdilər. Okan Gursan bildirir ki, ölkədə infrastruktur çox zəifdir, məhsulların saxtalaşdırılması geniş yayılıb, institusional korrupsiya, monopoliyalar var.
Gursan qeyd edir ki, Coca-Cola öz zavodunun genişləndirilməsi üçün Bakı Şəhərsalma və Arxitektura İdarəsinə müraciət edib. 8500 manat dövlət rüsumu ödəyib. Amma zavodun genişləndirilməsi üçün onlardan 100 000 dollar rüşvət tələb olunub. Gursanın dediyinə görə onlar rüşvət verməkdən imtina edərək tikintilərini aparmağa cəhd göstəriblər. Amma buna imkan verilməyib.
May ayında Coca-Cola bununla bağlı Prezidentin İcra Aparatının rəhbəri Ramiz Mehdiyevə şikayət göndərib. Cavabında isə onlara ödədikləri 8 500 manat dövlət rüsumunu geri qaytarıblar.
Coca-Colanın nümayəndələri bunun səbəbini soruşanda onlara Bakı Şəhərsalma və Arxitektura İdarəsinin geri tarixdə imzalanmış iki məktubunu göstəriblər. Həmin məktublarda şirkətin tikinti planında qüsurlardan bəhs edilir. Bu qüsurlar haqqında Coca-Colaya birinci dəfə idi deyilirdi.
Şüşə istehsalına monopoliya cəhdi
Gursan və Məmmədova şüşə qabların istehsalında da problemlər haqqında məlumat veriblər. Onların bildirdiklərinə görə butulka istehsalı üçün Cənubi Koreyadan xammal alırlar. Amma Dövlət Gömrük Komitəsi onların həmin xammalı ölkəyə gətirmələrinə imkan verməyib.
Az keçməmiş Azərbaycanda bir nəfər peyda olaraq bu xammalı daha ucuz qiymətə sata təklif edib. Coca-Cola ondan satış təklifi göndərməyi xahiş edib. Amma həmin adam göndərdiyi təklifində malın qiymətini yazmayıb. Onda Coca-Cola şübhələnib ki, bu adam həmin malın Azərbaycanda monopolisti olub da xammalı onlara daha baha qiymətə satmağa çalışır. Ona görə də bu adamdan xammal almaqdan imtina ediblər.
Bundan sonra Coca-Colanın Cənubi Koreyadan aldığı mal 28 gün Gömrük Komitəsindən buraxılmayıb. Sonunda da onlardan malın saxlanma xərci kimi hər günə 2000 manatdan 3000 manata qədər pul alıblar.
Saxta Cola?
Gursan əlavə edib ki, polis Gəncədə köhnə Cola butulkalarında saxta içkiləri müsadirə edib, amma onlar eyni saxta içkilərin başqa şəhərlərdə də peyda olacağını istisna etmirlər.
Beynəlxalq Maliyyə İnstitutlarının təmsilçiləri də ölkədə biznes mühitin buna bənzər mənzərəsindən bəhs ediblər.
Tərcümə: Azadlıq Radiosu
Hiç yorum yok:
Yorum Gönder